中環出更：比利時王后 訪港撐設計界
香江又有貴客，尋晚大約七點鐘，比利時王后Queen Mathilde同一大班比利時官員及該國駐港總領事官員簇擁下，現身調景嶺嘅香港知專設計學院，為香港及比利時設計界交流打氣，現場增添唔少皇室貴氣。王后駕到，非同小可，眾人群集一睹王后風采，包括行政會議成員胡紅玉、香港設計中心副主席鍾志平及時尚品牌代理虞茱迪（Judy）等城中名人都去趁熱鬧。
現身知專 名人紛捧場
今次展覽係知專、香港專業教育學院李惠利院校聯同「比利時精神」（Belgian Spirit）嘅當地設計單位合辦，展示比利時著名建築師及設計師Charles Kaisin過百件個人作品，同埋五十位比利時時裝設計師嘅作品。Charles被譽為比利時嘅設計新晉，多次獲邀為國際品牌操刀設計，佢享負盛名嘅代表作K-Bench今次亦有展出，係今次展覽的靈魂人物。
Charles一見Judy到場即刻笑容滿面，兩人攬頭攬頸好熟落，原來佢哋已相識多年，Charles特登邀請Judy去捧場。Judy經常周遊列國尋找創意潮物，問佢對比利時最深刻印象係乜？佢笑笑口話係朱古力喎。
身兼競爭事務委員會主席嘅胡紅玉就話，佢有唔少比利時朋友，個個都講四、五種語言，好唔簡單。佢自爆嚟緊將到比利時拜訪當地的競爭委員會官員，因為比利時係歐盟重要成員國，而歐盟競爭委員會嘅其中一個重要據點就設喺比利時首都，所以山長水遠都要去取經。
卓妮