【本報訊】三名單親爸爸為愛兒行蹤憂心不已，有爸爸為尋找愛兒，即使腳傷仍親身「落區」遍尋；但亦有「非常父親」，雖未知兒子身處何方，但依然「定過抬油」，因他相信離家出走的兒子，終會鳥倦知還，結果一語中的，愛兒重回身邊。
任職髮型師的黃先生，早前意外弄傷腳，現時走路仍一拐一拐，縱使舉步維艱，但為尋回愛子，仍負傷走遍上水、大埔和粉嶺，又向兒子的街坊朋友四出打探，只望兒子早日回家。「暉仔未試過離家出走，佢身上應該冇錢，呢幾日又凍，我好擔心佢，但要搵嘅地方搵過，要問嘅人問過，可以做嘅都做晒，依家惟有希望個仔自動自覺，乖乖哋快啲返屋企。」
另一失蹤男童張家偉，其父母三年前離異，張父因長期在內地工作，家偉遂交祖父母照顧。如今家偉音信全無，縱使張父公務繁重分身不暇，惟聞訊後仍即時着祖母趕快報警。祖母稱：「家偉十六日生日，我哋應承買蛋糕同佢慶祝，依家個孫都唔知去咗邊？我哋好驚佢畀黑社會分子氹去做壞事，又驚佢畀拐子黨捉返內地，劏開攞器官去賣命都冇埋，真係好擔心。」
任職飲食業的吳先生，則對有出走前科的兒子柏誠回家信心十足，「細路仔讀書有壓力，行出去一、兩日有乜問題？只係今次行耐咗啫！佢又唔係唔識路返屋企，有手有腳，要返就返o架啦！」結果吳父一語中的，柏誠「無飯開」下，主動現身向爺爺求救，最後回家。
有資深社工指出，青少年及兒童離家出走，很多時都因貪玩，與朋友三五成群流連街頭，或到友人家中及在網吧消遣留宿。由於他們未有能力搵錢，加上須解決食宿問題，故離家出走後「跟大佬」的情況十分普遍，因「大佬」會讓他們「黐飲黐食」，惟代價可能是要在威逼下，從事販運私煙、毒品等不法勾當。