投訴︰天花滴水四年查唔出
由食環署及屋宇署組成聯合辦事處專責處理滲水問題，卻因效率欠奉而被指虛有其名。有市民飽受滲水困擾逾四年，滲水辦每次接獲投訴未幾，即以「冇發現」為由終止調查，再遇投訴即視作新個案處理，不斷重複「既定程序」下，滲水源頭至今未明。專家直指問題源於滲水辦現有測試方法過時所致，立法會議員則批評部門處理個案程序混亂，未能急市民所急。
羅女士四年前發現單位天花有滲水迹象，向食環署求助後曾獲安排進行色水測試，惟未能找出源頭，「一句話搵唔到就close file（結束個案），我都冇晒符！」羅坦言曾嘗試與上層單位業主商討問題，亦曾自行為天花重新批盪並塗上油漆，惜滲水仍斷續出現，未能根治。
舊投訴當新個案處理
「真係滲（水）得好嚴重先搵滲水辦幫手，但佢哋次次都當新個案咁做，乜都要從頭嚟過，等得嚟啲水又乾番，跟住又終止個案，結果得個吉！」羅女士坦言，四年來多次向滲水辦求助均失望而回，天花亦因批盪不斷掉下而需以浴簾遮擋，近日窗台更有石屎剝落，「就係我哋小市民解決唔到先搵政府幫手，點知都係冇用！」
本報就事件向滲水辦查詢，屋宇署以食環署正在跟進個案為由未作回應，而食環署發言人則證實曾分別於○九、一○及一一年接獲相關投訴，但每次完成第一或第二階段測試後，皆發現受影響位置水漬已告乾涸，故不擬採取進一步行動；今年八月底再接獲投訴後，已在兩個月後為上層單位進行色水測試，現正等候結果。
然而，記者聯同香港公正行有限公司技術總監賴達明到羅女士單位了解，短短一小時已完成檢測。賴達明以微波掃描等儀器確定單位天花有滲漏，並以測試滲水酸鹼值的試紙，證實滲水並非由雨水引起，「水入面有磷酸鹽同輕微鹼性，係清潔劑或者沖涼液先有！」賴指有關資料均屬確定滲水源頭的重要元素，直指滲水辦現時的測試方法過時，「淨係用色水測試，梗係有排都搵唔到源頭啦！」
測試手法多年零檢討
「叫得做『滲水辦』，好應該有最先進嘅儀器同最快嘅程序幫市民搵滲水源頭，但咁多年嚟畀市民話冇鬼用，點解佢哋都仲係『零』檢討？」立法會房屋事務委員會委員麥美娟坦言亦不時接獲與滲水有關的投訴，批評滲水辦由處理個案效率、程序以至測試方法均「肥佬」，要求當局嚴正檢討。
圖／文：林松澧、楊育輝、詹海萍