政情：傳任新聞處長 聶德權口密

講嘢謹慎狂背書

有關人事嘅消息，仲有南區區議員馮煒光做新聞統籌專員應該無走雞，遲啲就會公布。而前社會福利署署長、依家係政務司司長辦公室專員嘅聶德權幫手做完人口政策諮詢後，遲啲就會接任黃緯倫嘅工作做新聞處處長。不過做得新聞處處長可能都唔方便放料，聶德權尋日出席青協網台嘅錄影節目都好口密，講嘢謹慎到有啲悶悶哋。

點解咁講？問佢對做新聞處處長準備成點，佢話等公布。問佢預計可唔可以同馮煒光合作愉快，佢封口唔講。問佢人口政策，佢就背書講番諮詢文件嘅內容。節目中有青年問佢點教小朋友，點知聶德權就話年輕人掌握學習技巧同有良好EQ好重要等等，再講番政府推行資歷架構鼓勵終生學習，都係悶爆。