肺炎鏈球菌可以攞命，好多人都關注。食物及衞生局局長高永文可能忙住解釋新疫苗計劃，忽略咗身體。尋日見佢出席立法會衞生事務委員會特別會議，就不停用紙巾抹鼻水。根據記者非正式統計，抹鼻次數最少有五次，連講嘢把聲都好磁性。議員蔣麗芸見狀，都忍唔住叫佢休息吓，或者打疫苗保護自己，即時引嚟議會內唔少笑聲。高局長聽到咁惟有尷尬多謝佢關心。
高局長尋日朝早出席政府化驗所嘅活動都未見病態，點知個幾鐘後去到立法會，鼻水似乎失控咁流，搞到要猛用紙巾抹眼抹鼻，都唔知係咪對立法會敏感。蔣麗芸即刻一副關心口吻：「一個人病最緊要休息，睇你病到咁嘅樣，係咪應考慮休息吓，或者麻煩你打疫苗啦。」可能擔心高永文傳播病菌。
講番個肺炎球菌疫苗計劃，蔣麗芸發問時又再失禮人前，問局長點分疫苗「乜價」，細路仔應打十三價定廿三價？其實只要蔣議員留心啲聽，就會知道張超雄議員早佢廿分鐘前已問咗同一條問題囉，或者新聞呢排都好多報道啦，衞生防護中心總監梁挺雄同局長都不厭其煩，答得好詳細。