政情：獲邀立會午宴 夏千福做「大茄」
立法會主席曾鈺成尋日按慣例宴請各國駐港新任領事出席交流午宴，相當「惹火」嘅美國駐港總領事夏千福，亦因為新官上任獲邀出席。不過，各國政要聚首一堂，講嘅並唔係乜嘢國家大事，而係飲飲食食同幫仔女撲學位。夏千福同立法會主席曾鈺成唔同枱，只能做個大配角。
冇得坐主家席
夏千福尋日現身立法會宴會廳，同場嘅仲有廿幾個國家嘅總領事。夏千福未有同主席曾鈺成同坐「主家席」，改由張宇人同李慧琼「陪坐」。原來張宇人同夏千福都喺美國連鎖快餐店做過，二人都係炸薯條出身，張宇人笑言，當年大家都係趁升大學前嘅暑假搵外快，但佢「入行」仲早過夏千福八年。
坐埋同一圍嘅議員都話，印尼同德國領事都不約而同呻國際學校學位難求，要求議員幫手諗諗計，仲話搵日再約出嚟慢慢傾。
至於去到邊都被指勾結外國勢力嘅議員李卓人就因為唔係同夏千福同枱食飯，而無緣「勾結」美帝勢力，但同枱唔少領事都趁機向佢「套料」，問吓香港政改前景。