政情：中環出更︰梁愛詩睇公仔童心未泯

一身唐裝打扮包到密密實實，胸前再掛咗一個證件套嘅詩姐，早前一個星期日下午與友人齊逛中環置地廣場，同行仲有一男一女。嗰陣下午兩點幾，商場內都好熱鬧，促銷貨品五花八門。不過詩姐對減價時裝或手袋無乜興趣，直至行經一個專賣聖誕裝飾專櫃，忍唔住駐足觀看。同行友人見狀乖乖企埋一邊等，由得詩姐慢慢睇。

聖誕裝飾 愈睇愈開心

小店布置色彩繽紛，有半個人咁高嘅聖誕小鹿、企鵝公仔、Q版雪人、趣怪聖誕襪及手袋，仲有原子筆、糖果等，款款造型夠卡通，搶眼到極。詩姐的眼球都被吸引，露出童真的笑容，愈睇愈開心。

小店布置色彩繽紛，貨品五花八門，搶眼到極。

詩姐着住唐裝衫褲，心口掛住證件套，自有其型格。

店員見狀，熱情地上前講解一番，當詩姐聽見原來係「願望成真基金」舉辦一年一度名為「分享願望的喜樂」慈善義賣活動，更加露出欣賞的眼神，笑瞇瞇聽店員解釋義賣詳情。不過貨品花多眼亂，一時間唔知買乜好，詩姐睇完一輪後，空手離開，再與等候嘅友人道別，獨自返回中環辦公室。

詩姐齋睇唔買，莫非無帶銀包？非也，店員話，佢主動問義賣專櫃擺到幾時，當知道限期至Boxing Day即係本月廿六號時，笑言遲啲會再來細心挑選。

講番「願望成真基金」，該基金旨在幫助患重病的兒童實現願望，意義十足，難怪詩姐咁buy。

卓妮