政情：新主席立智改善醫局
接替胡定旭做醫院管理局主席嘅梁智仁教授尋日履新，專登揀咗間同佢一樣咁「新」嘅北大嶼山醫院視察。眾所周知，去公立醫院睇急症隨時「等餐懵」，床位亦好擠迫，唔少病人要被迫瞓走廊，新上任嘅梁智仁就急不及待想履行佢嘅大計，講明上任後會從病人同家屬角度解決問題，希望以後唔好再煩到市民咁話喎。不過要唔好再煩到市民，係咪咁容易呢？
縮短輪候時間 挽留人才
梁智仁尋日履新，佢去咗今年九月底投入服務嘅北大嶼山醫院巡視，佢遊咗成個上晝，對北大嶼山醫院讚口不絕，猛話醫院嘅設備、環境都比其他公院好。梁智仁尋日特登針對性話會改善公院嘅輪候時間，包括穩定醫生流失率嘅問題，短期內安排培訓、升級，挽留有經驗嘅醫生，又話長遠嚟講，隨住兩間大學嘅醫科學額增加，唔夠人手嘅問題將會慢慢解決。梁智仁仲話要改善床位擠迫嘅問題，等啲病人唔好咁辛苦喎。
笑住讚北大嶼山醫院硬件
除咗改善問題，梁智仁仲分享咗個未來大計，佢指醫管局喺九○年成立之後，一直不斷改良，佢接手之後，希望可以繼續提供多啲訓練畀醫生，令佢哋可以全面地提供世界級服務，服務市民。喺學術方面，佢亦都想有多啲創新嘅臨床研究誕生。至於下星期食物及衞生局督導委員會將舉行第二次檢討醫管局運作，梁智仁就話佢相當重視呢個會議，希望從中得到更多寶貴意見。
不過，北大嶼山醫院人手相當不足，急症室每日只係開八個鐘，引嚟唔少區內市民鬧爆，去到出年第三季醫院先會有廿四小時服務。梁智仁尋日笑晒口話好欣賞醫院嘅硬件設備，如果佢代入區內居民嘅角度，唔知佢仲笑唔笑得出呢？醫管局問題多，資源又唔充足，醫生始終都唔夠，梁教授今次做咗主席，講得出醫管局問題所在，唔想市民煩又唔想市民辛苦，全部都係以民為本嘅諗法，希望醫管局運作檢討真係幫到市民，而資源又能配合啦。