政情：「關懷」愛滋 周一鑊快閃
平等機會委員會主席周一嶽（周一鑊）上任九個月，除咗頻頻落區做活動主禮嘉賓，間唔中晒歌喉娛人娛己，政績似乎等極都未有。適逢尋日世界愛滋病日，周一鑊又再出動，現身「關懷愛滋」宣傳活動，仲一再施展其「快閃」絕技，現身唔夠半小時就鬼祟鬆人。
舉食指嘟嘴着「守密」
仲記得周一鑊上月身體力行參加同志平權遊行，但被我哋發現佢嘅平權路只係介乎維園至崇光百貨，未完成遊行路線就靜靜雞離開大隊，認真唔要得。好似尋日嘅活動開始咗唔夠半個鐘，周一鑊眼見同場嘅政務司司長林鄭月娥率先離開，已經周身唔自在兼拎手機出嚟猛撳。果然輪到第一位表演嘉賓上台獻唱，周一鑊冇乖乖哋畀面欣賞歌藝，而係立即起身鬆人。
周一鑊櫈都未坐暖就「快閃」離場，我哋喺電光火石之間問周一鑊係咪要走？周一鑊竟然鬼鬼祟祟，喺嘴邊舉起食指作「守秘密」狀，我哋未及反應，佢已經轉身極速搭升降機落停車場。唔通佢以為自己係政務司司長，人閃佢又閃？