政情：中環出更：行樓梯減腩 郭炳聯都想
新鴻基地產尋日喺全港最高建築物環球貿易廣場舉辦垂直馬拉松慈善賽，超過一千位運動愛好者報名參加呢項跑二千一百多級樓梯嘅賽事。大會邀請到財政司司長曾俊華、新鴻基地產主席兼董事總經理郭炳江及郭炳聯兩兄弟三人到場主持開幕禮。郭炳聯話自己平日少行樓梯減肥，原因並唔係因為行樓梯太辛苦，而係因為佢嘅辦公室位處四十五樓，如果真係要行分分鐘要行半日。
郭炳聯話自己平日都有做運動嘅習慣，不過就以行山游水居多，有時都會行吓樓梯減肥，主要目的係想減走個大肚腩。位於灣仔嘅新鴻基中心樓高五十三層，郭炳聯辦公室就喺四十五樓，佢話自己平日都有諗過爬樓梯返工，不過就因為寫字樓樓層太高而打消念頭，改為日日搭升降機算數。佢又誇下海口話如果自己嘅寫字樓搬去十樓或更低樓層，佢一定會行樓梯返工喎。
曾俊華六點幾起身運動
雖然財爺喺主持起步禮後一級樓梯都無行過就走人，但郭炳聯透露財爺朝早六點幾已經起身做運動，每個星期六仲會去母校香港喇沙書院玩劍擊，運動量非常充足。佢又話兩人喺台上之所以不斷竊竊私語，並唔係討論緊樓市辣招，而係財爺向佢傳授健康秘訣，叫佢每日堅持早睡早起做運動，同埋千祈唔好因食得太多嘢而搞到成個肚腩凸咗出嚟。
薄利多銷 郭睇好港樓市
被問到地產商近期採取措施，喺賣樓時為買家抵銷辣招開支，郭炳聯話地產商都係想薄利多銷啫。郭炳聯又話中國嘅市場龐大，香港可以作為十三億中國人嘅金融中心，所以睇好香港樓市前景。
卓妮