政情：立會素食潮 想買洗菜機
時下唔少都市人推崇健康飲食，立法會尋日破天荒同社企Green Monday合作推出「無綠不歡星期一餐單」，每逢周一喺立法會餐廳提供素菜餐單，希望鼓勵更多議員同職員食素。出席啟動禮嘅秘書長陳維安（Kenneth）自爆，話有議員投訴周三自助餐嘅蔬菜因為擺得太耐而變黃，一度諗過買部臭氧洗菜機返立法會洗菜。
延保鮮期 太貴放棄
話說茹素多年嘅議員葛珮帆（EQ）早前喺立會宴會廳食飯時，見到啲菜由翠綠色變成泥黃色，於是叫Kenneth諗計改善食物質素。Kenneth費煞思量，後來聽朋友講臭氧洗菜機可以延長蔬菜保鮮期限，於是考慮喺立法會添置一部，但一部臭氧洗菜機要萬幾蚊，用嘅係納稅人嘅錢，最後梗係無買啦。
信佛嘅人民力量陳志全亦有逢初一、十五食齋嘅習慣，依家為響應活動更會食多兩日齋，又話朝早同一眾議員去赤柱監獄參觀時，監獄餐廳嘅負責人知道佢想食齋，於是特意下廚煮咗啲齋菜畀佢食，令佢喜出望外。