政情：今日你上鏡：與CY同場 唐唐講普選

全國人大常委會副秘書長李飛上個星期來港，闡述《基本法》同政改。全國政協常委唐英年尋日出席論壇之後主動同記者講，李飛發言同全國人大常委會秘書長喬曉陽多次發言本質上一樣，又話喬曉陽（喬老爺）早至二○○七年一個座談會上，就話提名委員會係用「機構提名」，證明自己幾熟書。對於泛民能否入閘參選嘅問題，唐唐就話希望普選制度係「公開公平」，定義係「有一套規矩，公開、透明、大家有共識」。唐唐呢句「金句」，真係放諸四海而皆準。唐唐尋日同特首梁振英一齊出席一活動，但兩人全無交談。