政情：中環出更：「扑得頭多」王英偉嘗被扑滋味
港區全國人大代表王英偉（Wilfred）過去十年，先後兼任浸會大學校董會主席及副主席，每年畢業禮都會向唔少社會傑出人士，進行俗稱「扑頭」禮嘅學位頒授儀式。習慣扑人頭嘅Wilfred今年換上另一個身份，同表內姪、全國政協委員黃英豪（Kennedy）分別獲頒榮譽人文學博士同榮譽法學博士，兩人雙雙被扑頭，二人都不約而同高呼「世事真奇妙」！
浸大第五十四屆畢業禮尋日舉行，剛卸任校董會主席嘅Wilfred憑藉多年來對浸大嘅貢獻，以及兼任多個公職等傑出政商成就，今年更進一步成為榮譽人文學博士得主。對於第一次「被扑頭」嘅心情，Wilfred笑言當時腦海入面，過去扑人頭嘅片段就好似倒帶重播咁，一幕幕湧現番晒出嚟。Wilfred透露，想當年曾經向唔少著名教授頒授名銜，就連國務院前副總理李嵐清、全國人大常委會前副委員長許嘉璐都要向Wilfred俯身行扑頭禮，認真巴閉。
雖然懷緬昔日嘅光輝，但Wilfred補充自己都好想一嘗被扑頭嘅滋味，而尋日終於如願以償，更獲父母、太太、兩個細佬同弟婦，連公司唔少高層都現身撐場。其歌手囝囝王梓軒就因趕住開騷，做完司機接送媽咪到會場就走咗。囝囝以工作為重，Wilfred當然體諒冇詐型啦！
吳建民同獲授榮譽銜
獲頒榮譽學位嘅仲有資深外交家兼中國外交學院教授吳建民，吳教授過去多次來港交流，坦言內地學生嘅個人發展同創意教育都唔及本地學生，決定利用過去多年嘅外交人脈穿針引線，吸納海外精英學生赴內地交流，當中不乏本地學生。其餘獲頒榮譽博士學位嘅仲有內地著名藥物化學家陳凱先以及耶魯大學教授宋惠慈。
卓妮