東方報業集團全新旗艦網站「on.cc東網」推出以來，讀者體驗非一般閱報樂趣，相信唔少人已經領略過當中嘅樂趣，不過大家又知唔知道，東網嘅威力到底有幾大呢？不如咁啦，等功夫茶略略介紹一下。
「on.cc東網」日前刊登一則關於台灣職棒「傳麗寶買下象隊」嘅獨家消息，一出街即時引起台灣社會哄動，至昨晚八時，該則新聞就有超過四十八萬點擊，你都咪話唔犀利。同一則獨家消息，喺社交網站facebook又產生乜嘢反應呢？巴閉咯，累積超過三萬七千個推介，即係網民非常熱烈分享開去。大家可想而知嘞，「on.cc東網」嘅威力係幾咁巨大！
「on.cc東網」隆重登場之後氣勢如虹，為咗回饋讀者同網民，東方報業集團推出震撼優惠，全球免費開放《太陽報電子報》及《好報電子報》，等大家無論身處何方，都可以隨時隨地原汁原味享受閱報樂趣。好嘞，免費開放電子報之後又有乜嘢反應呢？功夫茶不得不講一句，各位親愛嘅讀者果然識貨，《太陽報電子報》及《好報電子報》免費開放首日，瀏覽頁數應聲激增三倍。而全新東網自本月三日推出以來，至尋日安裝「on.cc東網」Apps已突破三百萬次！
講真吖，當年由東方報業集團首創嘅電子報，對於鍾情於實物報紙嘅粉絲而言簡直係福音，畀到各位逐頁揭報紙嘅良好感覺。尤其係身在異鄉嘅海外華人，未必咁容易買得到實物報紙吖嘛，行到邊睇到邊嘅電子報就係最佳選擇。
立足香港，服務全球，免費開放《太陽報電子報》及《好報電子報》當然係天大好消息啦，而且毋須登記十分方便，不過可能有人會問，已經付咗費嘅舊有訂戶點算好呢？嗱嗱嗱，呢一層各位請放心，東方報業會安排退款，等大家一齊享受免費開放電子報嘅震撼優惠。
唔好唔記得，今次嘅震撼優惠只係第一波，跟住仲有第二擊，然後再有第三炮，即將陸陸續續隆重登場，請全球各地讀者同網民密切留意東網嘅消息，千祈唔好錯過呀！
全球華人原汁原味免費閱讀電子報，唔止係讀者同網民嘅天大喜訊，廣告客戶同樣係眉開眼笑。你知啦，東方報業集團係本港首屈一指嘅新聞權威，加上無邊無界嘅網絡威力，廣告客戶推廣產品如虎添翼啦。
上東網，知天下，絕對唔係一句宣傳口號咁簡單，係有客觀事實證明o架。總而言之，「on.cc東網」每日為全球華人及關心兩岸三地嘅人士，帶來最新最快最精彩嘅即時新聞資訊，瞬間掌握天下時事脈搏。由網民熱烈分享嘅情況就可以明白，東網在手，天下我有！