潮流興環保，好多餐廳依家都會加入綠色餐單，一來唔食肉可以減少碳排放，二來都畀食素嘅人多一個選擇，亦可以推廣綠色健康生活。其中立法會都有茹素者，例如秘書長陳維安、議員葛珮帆（EQ）等。唔知係咪佢哋大力推動茹素文化，立法會秘書處尋日就發出通告，話都會加入呢個環保行列，響應社會企業「綠色星期一（Green Monday）」呼籲，由下星期一開始，立法會餐廳每逢星期一都會提供綠色餐單，實行「無肉星期一」，到時除咗議員，連茹素嘅職員同記者都可以食埋一份，唔知道食齋可唔可以減低大家嘅火氣呢？