政情：岑智明大晒珍藏風災相
天文台台長岑智明上任兩年多以來，除咗熱衷日常天文氣象工作外，得閒仲會上拍賣網競投昔日本港受風災影響同舊香港面貌嘅相片或明信片，當中明信片閒閒地都要幾百蚊一張。尋日佢同傳媒聚會時，就展示咗幾十張私人珍藏，包括兩張一九三七年本港受颱風吹襲期間令一艘船沖上中環岸邊嘅相片，台長透露用咗近四位數字金額購買，仲話收集咁多舊嘅風災相片，係用作日後寫書之用。
講到私人珍藏，岑智明愈講愈開心，仲提到試過用三千蚊買咗張昔日訊號山面貌嘅相片；又話有個朋友用咗一千一百一十一美元喺網上買咗張昔日香港面貌嘅舊相片，而自己就喺太子某間收藏店以較低價錢購入，講到呢度佢即時露出一副滿足笑容。
另外，天文台下月三十號開始，會由天文台專業隊伍向傳媒提供免費電視天氣節目同稿件，除了日常定時天氣預報外，每逢星期五嘅黃昏節目都會加插「氣象冷知識」，希望提高市民對颱風嘅危機感，有關節目亦會經Youtube播出。