政情：黃宜弘夫婦 千里撐四叔
恒基地產主席李兆基（四叔）捐建四川廣元市中心醫院，前日舉行以佢命名的內科大樓落成啟用儀式時，好多城中名人千里去撐場，包括立法會前議員黃宜弘（IQ博士）及太太梁鳳儀、理工大學前校長潘宗光及現任恒地獨立非執董胡經昌等人。廣元位於四川、陝西及甘肅三省交界，位置偏遠，眾人要專程去深圳寶安機場搭內陸機至去到。IQ博士話，今次係佢首次到訪廣元，幾遠都無乜所謂。
遠赴廣元支持老友
IQ博士告別政壇後生活逍遙，太太梁鳳儀爆料話，丈夫做議員時好唔得閒，卸任後終於可以做多啲嘢，除咗睇自己盤包裝印刷生意外，仲周圍去旅行。IQ博士一向好鍾意跳社交舞，去年佢哋終於去咗英國觀賞社交舞賽事，今年原本想到南極探秘，點知旅行團逼爆，惟有等明年。至於梁鳳儀同四叔一向老友，四叔本自傳係出自佢手筆。佢話同四叔已相識卅載，自然要去撐場。
