政情：助理頻劈炮 議員頭痕
年尾一向好難搵工同難請人，皆因唔少打工仔一心諗住等埋份花紅先至轉工。不過，立法會就唔會好似其他公司咁向員工發放雙糧或花紅，增加請人難度。無獨有偶，近期唔少議員助理趁年尾紛紛遞信走人，當中包括議員田北辰（田二少）、漁農界何俊賢（高佬賢）同陳恒鑌（Ben），搞到各議員辦事處（議辦）大呻唔夠人做嘢，搞到其他職員工作量大增。
薪金太低 要求過高
每次立法會選舉過後，各議員都會周圍招攬人才加入議辦，除咗要幫手處理一般寫字樓雜務外，部分助理仲要幫手做政策研究，或者寫定啲講稿等老闆可以喺開會時宣讀。咪以為呢啲工作只係手板眼見工夫好容易做，議員作為民意代表，要經常留意社會發生嘅大小議題，而一眾尊貴嘅議員根本無暇留意所有議題，加上有啲係大懶蛇議員，所以就各議題做資料搜集等工作就落喺助理身上。
例如百足咁多爪嘅田二少，無論教育、環保、醫療、交通等政策瓣瓣都想掂，所以就算請足三個政策研究助理都仲未夠，話要請多一個先夠數。不過，連佢都大嘆現時求才困難，應徵者一係唔啱心水，就係經驗不足，仲試過有應徵者竟然淨係着住條短褲去寫字樓見工，搞到佢真係揀唔落手。據理解，有啲議員請唔到人，皆因人工出手太低；亦有議員出得起錢請人，亦可能因為應徵者擔心老闆要求太高而卻步。
高危行業 合約期短
高佬賢同阿Ben嘅寫字樓近來都有人劈炮唔撈，現正煩惱緊點樣填補番個空缺。高佬賢話，議員助理呢行算係冷門行業，加上合約最長只得四年，如果議員連任唔到，就好可能要執包袱走人，所以唔少人寧願做第二行，都唔想做議員助理呢個高危行業。不過，有議員請唔到人，亦都有人請到得力助手，好似工聯會麥美娟同「慢必」陳志全早前都愁緊請唔到人，但最近已經成功請到心水助理，寫字樓終於可以齊人開工喇。