中環出更:出席峰會 張炳良「釣魚」失策

今屆政府主打口號「民生無小事」,強調同地區工作嘅溝通協調,因此整個問責團隊上任後都不停落區會見市民。其中因為建屋爭議而經常捱轟嘅運輸及房屋局局長張炳良,唔知近期係咪忙於落區「撲火」搞到冇覺好瞓,尋日朝早出席地方行政高峰會交流時,就多次當住傳媒、官員及區議會代表約六十幾人面前瞌眼瞓「釣魚」,認真失策。

頻落區唔夠瞓?

張炳良近來為咗長遠房屋策略諮詢頻頻落區,加上機場管理局高層近日就機場北部土地用途引發內鬥,董事會成員羅康瑞更一氣之下劈炮辭去基建規劃委員會主席一職,有傳令政府喺機場興建商業中心嘅如意算盤遇阻滯,張炳良唔頭痕就假喇。

唔知係咪因為咁,張炳良尋日同部分局長出席高峰會同地區代表交流期間多次烏眉瞌睡,雖然佢睇嚟只係閉目養神,冇瞓到流口水出洋相,亦識得喺適當時候、例如講到房屋發展問題即刻醒水坐番定,但真係奉勸佢要多啲休息。

卓妮

第一手消息請下載on.cc東網iPhone/iPad/Android/Windows Phone Apps