政情:大樓甩漏多 鄉局又破費

新界鄉議局近期為反對大浪西灣村納入郊野公園範圍,不惜以文鬥武鬥方式同政府打硬仗,但原來局方除咗「外患」之外,亦有「內憂」。我哋之前講過,沙田石門鄉議局新大樓耗資約二億元興建,局方啱啱先至成功賣出位於九龍塘舊大樓還債,又將其委員專用停車場改設成時租停車場賺錢,錢銀方面確係鬆動咗,可惜大樓嘅執漏就好似無底深潭咁,執完呢度又要執嗰度,近日又話要維修喇。

今次要75萬維修

鄉議局新大樓入伙超過兩年,過去時不時都聽到話要使錢去執漏,包括執漏水、換地板、加大電錶、維修柱躉裂痕等,最近又話係時候要維修喇。據了解,除大樓內嘅大劇院早前因制冷系統出現故障,要緊急維修外,分體式冷氣機亦陸續出現問題,停車場入閘電腦系統都要進行檢查及維修,呢度一筆嗰度一筆就要用上七十五萬元。呢座大樓外表再宏偉都好,實際上只係金玉其外,唔知內裏仲要維修到幾時。

第一手消息請下載on.cc東網iPhone/iPad/Android Apps