手機收買黨攻陷旺角
鬧市街頭變身手機收購場，食環署竟稱未能執法。新款智能電話有市有價，近日有新款型號推出隨即掀起炒賣潮，令旺角街頭遭大批「手機收買佬」攻陷。有市民不滿街道被堵塞而向食環署投訴，食環署竟指收購手機者並非「小販」，未能執法，旋即遭立法會議員踢爆「講大話」，直指有條例賦予執法權，認為食環署有混淆視聽兼嚴重失職之嫌。
「嗰班人日日喺度開檔收電話，成幾十人喺街邊做買賣都冇人理！」阿文指旺角亞皆老街一段行人路早被多個收買手機攤檔「攻陷」多時，幾乎每天均有最少六個檔攤在人多路窄的行人路上經營，造成嚴重阻塞。阿文曾就問題向食環署投訴，詎料職員竟以：「做唔到，淨係可以叫佢擺埋啲。」作答，令阿文深表不滿。
「收購電話不屬小販」
當區區議員許德亮亦稱，曾接獲多宗上址攤檔阻街投訴，不滿遭懷疑「收買佬」滋擾，「試過好幾次經過嗰度，都有人攔住問我有冇電話賣，同食環署投訴過，佢哋話一嚟蒐證有困難、二嚟唔係售賣行為，所以做唔到嘢！」許又稱，每逢有新型號智能手機推出情況更見失控，不但影響街道秩序，亦因收買電話活動缺乏監管，即使出現糾紛，市民亦難以追究，要求當局關注問題。
食物環境衞生署發言人承認，去年至今接獲三十七宗同類投訴，惟根據《公眾衞生及市政條例》，「小販」的定義不包括街頭流動經營者向市民收購二手電子產品活動，故僅能勸喻有關人士，而同期則曾向上址一帶造成阻塞的持牌流動小販提出共七宗檢控、拘控一名無牌小販及檢取一宗小販丟棄物品。
公地阻街可被檢控
「捉阻街唔一定要用《公眾衞生及市政條例》，《簡易程序治罪條例》4A條都講明，任何人喺公眾地方造成阻礙就可以被檢控，食環署都可以用呢條例執法！」立法會食物安全及環境衞生事務委員會委員陳恒鑌踢爆食環署以「無法可執」為由圖置身事外，有混淆視聽兼嚴重失職之嫌。
陳恒鑌又說，近年炒賣智能電話風氣熾熱，不少人甚至投身全職炒賣行列，令收買檔攤火速席捲旺角街頭，情況不容忽視，「政府唔好再好似之前處理易拉架阻街咁，開頭口口聲聲話做唔到，係都要等到失控、傳媒報道先做嘢！」
記者：阮佩君