歷史悠久係咪一定有保育價值呢？當然唔係啦，古董都有好壞優劣之分，唔係任何物品放置一百幾十年都有資格成為價值不菲嘅珍品。打個譬喻吖，飽歷風霜依然屹立不倒嘅禮賓府就話有資格列作古蹟啫，唔通甩皮甩骨嘅爛鬼木屋由得佢存在超過一世紀唔拆咩？
唔講大家可能唔知，石澳原來有一個存在咗四十四年嘅古董級康樂設施，嚴格而言算得上係高尚玩意，之但係今時今日就變得阻住地球轉。即係咁，自從一九六九年啟用以來，石澳就有一個面積約一千二百平方米嘅障礙高爾夫球場。喂，高爾夫喎，你話係咪高尚玩意吖？問題係呢一個所謂高爾夫球場其實屬於兒戲低級版，只適合短距離推桿，一般正常高爾夫球手眼尾都唔會睄一睄。
古董級康樂設施兒戲到極，無人問津拍烏蠅，一來浪費資源，全年收入連支付職員薪金都唔夠，二來咯喎，實在阻碇，阻礙石澳一帶嘅交通。假設你星期日開車去石澳泳灘玩水，你最有可能遇見嘅情況係公眾停車場爆滿，等候泊位嘅車龍塞得水洩不通，加上附近一帶不設行人路，人車爭道場面肯定混亂。好嘞，空無一人嘅高爾夫球場由於位處公眾停車場同石澳道之間，所以形成樽頸效應，導致交通塞上加塞。喺呢個時候，你大概會諗，如果冇咗呢個拍烏蠅嘅兒戲球場就一天都光晒咯！
本報記者去過現場視察環境，逗留半日都唔見有人光顧玩推桿，同外面喧鬧嘅街道簡直有天淵之別。球場職員大概因為無事可做啩，每次都被記者發現瞌眼瞓。
康文署發言人話喎，場地使用率的確不高，一○年考慮改建為三人籃球場，並且諮詢南區區議會及居民組織意見，但居民組織對建議有保留。發言人又話，去年再同居民組織商討，居民組織原則上支持將場地改建為泳灘更衣室，以及改善前往泳灘嘅行人通道。至於審計署，發言人表示已知悉有關問題，會喺制訂工作計劃時審慎考慮，以決定是否進行審計。
其實計功夫茶話齋，小販阻街都要拉要鎖啦，若然阻街嘅竟然係門堪羅雀嘅兒戲球場，搞到人又冇路行，車又冇位泊，改建真係無可厚非喎，應該唔會有人覺得係摧毀歷史文物。至於改建為乜東東最好，咁就不妨集思廣益嘞，大原則當然係改善石澳嘅交通擠塞問題啦。
呢嗱嗱嗱，麻煩審計署認真審計一下，唔好任得康文署職員繼續浪費資源瞌眼瞓，審完計完畀全港市民一個有益有建設性嘅交代！