政情：發叔民記做大戲「郊」貨
廿幾年來未試過喺立法會提出修訂嘅鄉議局主席劉皇發，十二月會提出「處女修訂」，要求大浪西灣剔出郊野公園範圍。由於要分組點票，只要泛民主派齊齊整整就可以否決發叔嘅修訂。雖然發叔、民建聯（民記）同一班環保團體應該預知投票結果會係點，但仍然樂意搞場大龍鳳，估計目的係為咗做畀自己支持者睇，以示「嗱！我已經做咗嘢喇！」
約環團傾冇結果
民記為穩固鄉事票源，好大機會支持發叔嘅修訂，但佢哋仍要表現出聆聽民意，所以尋日約見由廿幾個環保組織組成嘅保衞郊野公園大聯盟。一如所料，成個會議都無結果，大聯盟代表周月翔都話對民記不予厚望，只係盡量游說。
據聞發叔都唔想搞大件事，奈何一班地區鄉紳頭目好大反應，發叔惟有喺議會提出修訂，叫做安撫一班鄉紳，就算到時修訂被否決，都可以將矛頭指向泛民議員。所以投票結果根本唔重要。最重要係大家落力「入戲」，等自己可以向選民或支持者有所交代。