政情：議員抗辣招 借雙非拉布?
買家印花稅（BSD）「辣招」實施咗差唔多年幾，立法會現時仍然審議緊呢條法案，基本上議員每次開會都係就住類似問題拖拖拉拉。好似尋日個會議就有好多議員擔心有人利用「雙非嬰兒」名額買樓逃避BSD，認為係大漏洞，會令成條法案盡廢。雖然政府反駁話過去兩年只得三宗有關個案，但班議員依然死咬唔放，足足拗咗兩個鐘先至收工。究竟係班議員擔心雙非嬰被人利用，定係利用雙非嬰不停拉布呢？
兩年僅三個案
政府容許監護人同信託人幫未成年雙非嬰買樓，都獲豁免繳交BSD。泛民主派同建制派議員都不停追問呢個問題，其實已問咗個幾兩個月，但政府來來去去都係咁答。運輸及房屋局副秘書長王天予回應話，過去兩年只係得三宗個案係有信託人同監護人幫未成年雙非小朋友買樓，認為日後唔會有太多類似個案。雖然官員解釋咗，但班議員樂此不疲繼續追問，議員涂謹申成為泛民重炮手。
阿涂問如果三唔識七都可以做信託人，咁個個都走去搵雙非嬰幫手買樓，然後賺到錢兩份分？政府就話稅務局會把關，總之唔會隨隨便便批出豁免。
點知呢句話激嬲眾議員，地產及建造界石禮謙就話，任由稅務局決定邊啲人豁免，而唔係根據法律辦事，咁稅務局咪變咗「陪審團」？政府就回應話，如果市民唔滿意稅務局決定，可以透過法庭訴訟喎。
呢個時候工業界梁君彥隨即加把口話：「你哋政府咁鍾意叫人去法庭，咁要立法會嚟做乜？」最後連好少講嘢嘅旅遊界姚思榮都話咪煩啦，不如一刀切將十八歲以上人士買樓先獲豁免，咁咪一天光晒囉！其實班議員講到個漏洞好似洪水猛獸咁，政府又認為無問題，如是者不斷拖拖拉拉，無止境咁爭拗落去，莫非班議員想「拉布」，以時間換取空間，想政府減辣？如果係嘅話，估唔到議員連雙非嬰條尿布都拉埋。