政情：中環出更：陳正欣歎米芝蓮店獲贈香檳書
靚酒與美食係天作之合，活躍於社交界與慈善團體嘅保良局總理陳正欣（Daniel），經常出外應酬傾生意，對飲食嘅要求更加一絲不苟。卓妮有日下午喺中環見到Daniel與幾名外籍友人喺一間米芝蓮三星級嘅意大利餐廳用膳，臨走之前同店員有講有笑，店員仲送上一本小冊子，唔通咁快就推銷定聖誕派對嘅菜單？
當日下午兩點幾鐘嘅時候，Daniel同兩位外籍男友人現身位於中環歷山大廈二樓嘅米芝蓮餐廳「8 1/2 Otto e Mezzo BOMBANA」，佢哋剛剛用膳完畢，正欲步出餐廳之際，企喺門口嘅侍應向佢哋遞上一本小冊子，並從旁向佢解釋該小冊子嘅內容。
事業慈善兩邊忙
Daniel好專心咁聽，之後收下小冊子，最後同友人道別離開。卓妮上前同Daniel打招呼，問佢手上嘅小冊子係乜？佢笑笑口話，自己不時幫襯呢間餐廳，最鍾意品嘗Krug法國香檳，於是侍應送咗本關於Krug嘅書畀佢睇。最近由鐘錶界進軍服裝零售界嘅Daniel話，近日事業同慈善兩邊忙，呢日就忙裏偷閒同朋友嚟摸吓酒杯底鬆一鬆喎。
Krug被譽為「香檳之王」，而呢間米芝蓮餐廳嘅店東，正係有「白松露王」之稱嘅名廚Chef Bombana，Daniel認真識飲識食。
卓妮