投訴投訴，如果有人投訴中環上亞厘畢道一座叫做禮賓府嘅建築物，懷疑灑水系統運作不正常，隨時有發生火警嘅危險，你估消防處敢唔敢派人硬闖調查吖嗱？
或者，如果有人投訴滙豐銀行金庫懷疑灑水系統運作不正常，存在安全隱患，你估消防處又會唔會派人硬闖調查吖嗱？
大家可能會話，唔好玩啦，禮賓府同滙豐銀行金庫咁敏感嘅地方，有乜可能話查就查o架，官老爺隨時控告投訴者報假案o架。功夫茶以前真係會咁諗，不過經過消防處硬闖傳媒之後，發覺原來惡意投訴係冇問題嘅，即係話報假案都唔使負責。
嗱，今年六月消防處以接獲一封電郵投訴為名，派人高調踩上位於大埔工業邨嘅東方報業中心，仲要去到最敏感嘅心臟地帶伺服器房，左查右查結果證實投訴不成立。對於呢一種嚴重侵害新聞自由嘅行為，立法會議員陳偉業仗義執言，向當局提出書面質詢，要求交代有冇濫用職權滋擾傳媒，保安局局長黎棟國係就係交出書面回覆，不過既冇交代點解未經查證就上門滋擾傳媒，亦冇交代會唔會追究有人虛報嘅責任，答咗等於冇答。
當局愈描愈黑，即係變相鼓勵市民報假案啫。不如咁嘞，功夫茶懷疑消防處有人賣淫，麻煩警務處派人硬闖查一查！
話時話，欲加之罪，何患無辭。東方過去先後十二次遭政府唔同部門上門滋擾，受到嘅不公平對待簡直罄竹難書。就舉一個例子吖，○五年底《東方日報》及《太陽報》刊登一輯Kelly Brook沙灘性感照，打晒格仔仍然被淫審處評為二級不雅，但係《蘋果日報》刊登同一輯照片，只係評為一級非不雅。更古怪嘅係，喺香港有售嘅外國雜誌《NOW》刊出Kelly Brook裸照，冇打格仔，冇包膠袋，連送檢都唔使。同一輯照片竟然有三重標準，你話唔係選擇性執法係乜呢？除咗選擇性檢控之外，仲有一招叫做贏官司輸訟費，當局打壓東方簡直無所不用其極。
其實踩上門嚴重侵害新聞自由唔止消防處o架，警務處、衞生署、食環署、影視處、淫審處、私隱公署、平機會等等，簡直沒完沒了。嗱，警方○六年指《太陽報》一篇專欄文章「鼓吹暴力」，煞有介事派人踩上東方報業中心，要求提供作者資料以及審批機制。何謂莫須有？何謂文字獄？何謂白色恐怖？一目了然啦！
早前有大學發表調查報告，指香港傳媒有自律現象喎。計功夫茶話齋，傳媒有冇自律根本無從稽考，大學倒不如研究一下港府點樣打壓傳媒好過啦，東方可以提供大量佐證。
總而言之，消防處硬闖東方係事實，東方灑水系統運作正常亦係事實，黎棟國冇正面回覆議員質詢都係事實，幾樣嘢加加埋埋，咪就係特區政府迫害東方嘅鐵證囉！