政情：黎穎瑜火速申報利益
齊心基金會前副行政總裁黎穎瑜（Jade）履新勞工及福利局政治助理只係幾日，但我哋發現佢已將個人利益申報放上網。佢丈夫姓何，從事金融風險管理顧問工作，二人合共擁有四個住宅同商業單位，遍布中港同日本，其中兩個分別係Jade名下嘅廣州商業單位，同埋佢丈夫位於日本東京嘅自住單位，睇嚟Jade喺未入政府之前都算投資有道喎。
暗示唔「跳船」
Jade係接替今年八月以照顧年輕子女為由請辭嘅莫宜端（Zandra），二人都係已婚人士，而且有小朋友。Jade尋日首次現身立法會，被問到日後會否好似Zandra以照顧兒女為由離開政府時，Jade自爆媽媽幫手照顧小朋友，又話兼顧工作同家庭係在職媽咪面對嘅重大抉擇，似乎暗示入得政府，就唔會有「跳船」打算。
其實Zandra同Jade都有好多共通點，首先二人同為三十會成員並一早認識，而Jade嘅家姐同Zandra仲係中學同學添。其次二人嘅政治敏感度好高，同樣喺上任之初就申報個人利益，夠晒穩陣。