政情：劉堃曾日洗二百隻碗
飲食業人手短缺，洗碗工更成為重災區，喺灣仔開設車仔麵檔大半年嘅民政事務局前常秘李麗娟公子劉堃（Chris），都大嘆請人難。Chris要做樓面打雜一腳踢，每日做十一小時無停手，更因為請唔到人洗碗，焗住自己走入廚房，日洗兩百隻碗。
麵檔請唔到人
投資逾百萬元首次創業嘅Chris，日前出席一個文化活動，講起生意經，大嘆有工無人做，最頭痛莫過於請唔到人洗碗。Chris話，試過唔夠人洗碗，廚房一度堆積兩百隻碗，見客人無碗用，平日唔多使做家務嘅佢，第一時間摺起衫袖，將雙手插落水缸度洗呀洗，洗足一日無停手。
起初Chris連手套都無戴，想話洗快啲，但洗咗幾日，皮都皺晒，夜晚返到屋企，依然一陣皂水味，阿媽睇見心都痛埋。Chris就笑笑口話濕濕碎，心願係將車仔麵文化發揚光大，諗住喺跑馬地物色新址開樓上舖。
Chris坦言暫時仍係「白做」無糧出，幸好每日兩餐有至愛豬紅、蘿蔔及豬皮慰勞自己，即時開心晒。