政情：突襲郊園令發叔甩轆

稱拒接受「大石砸死蟹」

《2013年郊野公園（指定）（綜合）（修訂）令》小組委員會尋日早上開會，點知之前無出席過嘅發叔突然現身，大家都心知唔係咁簡單。當發叔一開始講嘢時，就被小組委員會主席何秀蘭（Cyd）提醒佢必需申報利益。發叔坦承喺新界有「相當唔少」嘅零零碎碎土地，但阿Cyd就話發叔申報得唔夠詳盡，最後要發叔確認喺上述三幅土地上冇擁有權益先至可以發言及提出動議。

發叔之後話，《基本法》保障私有產權，強調新界佬其實都好聽話，而業權人亦唔係僵硬反對將土地納入郊野公園，但政府今次係官逼民反，萬萬不能接受政府以「大石砸死蟹」嘅手段，強行褫奪私人土地不作任何合理補償。佢又話，明明鄉議局、西貢區議會同鄉事委員會都反對將大浪西灣納入郊野公園，仲有西灣村民提出司法覆核，但政府仍一意孤行。

意向式表態無約束力

最後發叔仲動議以小組委員會名義提出廢法，表面上係威係勢，可惜委員會未到逐條審議階段，加上發叔嘅修訂文本又寫得唔清唔楚，唔符合修訂文本嘅基本要求，所以佢焗住將動議改為意向式表達。雖然最後都通過咗動議，但動議並無約束力，而廢法亦要經過大會投票先可以通過。環境局就話會繼續爭取議員支持，睇嚟今次發叔「發威」，都係向村民表態或交差居多，實質用途唔多大喇！