中環出更：去飲「爆裙」 葉劉狼狽
最近唔少政商界名人辦喜事，行政會議成員兼立法會議員葉劉淑儀上星期六都要一日走兩場婚宴，但當日就發生咗件令佢幾尷尬嘅事，就係佢件法國品牌晚裝飲衫突然爆拉鏈，搞到要囡囡Cynthia臨急衝去酒店內嘅時裝店幫佢買長衫替換。不過，Cynthia幫媽咪搵咗兩件少女尺碼嘅長衫，搞到葉劉始終都係要返屋企換衫再去另一場婚禮。
話說葉太條法國連身裙晚裝嘅拉鏈由頭爆到落裙腳，Cynthia救母心切，即刻衝咗去酒店嘅時裝店借咗兩件紫紅色同綠色嘅長衫畀葉太試，可惜兩件都太細着唔到，Cynthia惟有去借大頭針同葉太入女廁扣住條裙先，然後再同葉太返屋企換衫趕去灣仔會展飲中港照相器材主席孫大倫兒子嘅婚宴。
走後門避鏡頭
葉太就向卓妮呻話，條連身裙成萬幾蚊，寫明法國製造，估唔到會爆拉鏈咁差，當日為免被記者影到，佢仲特登走後門離開酒店，真係狼狽不堪咁話。不過，葉太當日有Cynthia陪住佢、又幫佢撲來撲去，難怪佢大嘆︰「好彩生女咋！」
卓妮