中環出更：夜行唔開車燈 貪曾犯法累人
貪盡海陸空、歎盡省港澳嘅「貪曾」前特首曾蔭權爵士，上周六晚同太太鮑笑薇出席完尖沙咀一場婚宴後，乘坐政府七人座駕返回其寓所期間，竟然知法犯法唔開車燈，於黑暗街道中穿插長達十二分鐘！貪曾作為駕駛人士，好應該知道夜間行車唔開車燈係違法，就算佢罔顧自己安全，都唔應該危害其他道路使用者嘅安全，咁樣累人累物，何必呢？
當晚貪曾夫婦乘坐政府七人座駕，先到灣仔會展中心出席中港照相器材主席孫大倫兒子嘅婚宴，然後趕往尖沙咀洲際酒店，再飲葉國謙公子嗰餐喜酒。貪曾夫婦由晚上八點半鐘一直坐到十點五十分，飲到面紅紅先至施施然咁離開酒店，然後喺一名G4（保護要人組）人員陪同下，登上七人座駕返回其淺水灣寓所。
不過，貪曾座駕駛離酒店後，一直都唔開車燈，無論低燈同大燈都無開，同其他有開車燈嘅車輛相比，顯得十分礙眼。其後座駕沿梳士巴利道、九龍公園徑行駛，去到尖沙咀消防局對出交通燈位停下時，居然連交通燈轉綠色後數秒都仲未開車，阻塞後面車輛，直至聽到後面車輛響「按」先肯開車。
卸任後照害市民
最後貪曾座駕駛至連翔道左轉西區海底隧道，進入車輛稀少嘅路段至開番盞大燈。莫非貪曾係別有用心，怕被人跟蹤，所以刻意叫司機唔好開車燈？無論咩原因都好，夜間行車唔開車燈，除咗違法外，亦令其他道路使用者難以察覺其座駕，好多交通意外就係因此發生。
根據《道路交通條例》第三百七十四G章第四十七條「汽車上的照明」中指示，車輛喺黑夜中行駛，唔開車燈屬違法行為。貪曾座駕喺夜間行駛唔開車燈，好明顯係知法犯法，佢在任特首時已經連累市民，估唔到卸任後都仲想累街坊，唔通港人前世欠咗佢嘅？
卓妮