中環出更：政商齊賀 黃玉山兒子結婚
政商界每逢年底特別多喜事，最新一樁喜事係消費者委員會主席黃玉山嘅兒子Brendan結婚，上星期六喺灣仔一間酒店舉行結婚儀式兼筵開三十七席，政商界紛紛到場祝賀，包括教育局局長吳克儉、香港基本法委員會副主任梁愛詩等，場面認真熱鬧。
黃玉山娶新抱擺酒，卓妮都有到場去湊熱鬧。黃玉山公職多多，本身係港區人大代表，又係候任公開大學校長，因此今次辦喜事，好多政商界中人都親臨祝賀，如恒隆地產董事總經理陳南祿、港區人大代表譚惠珠、馬豪輝、姚祖輝、陳勇等都有出席。
一早到場嘅吳克儉話，自己同黃玉山認識多時，因此一早喺個人日曆記低呢個日子；立法會中總代表廖長江都有帶賀禮嚟，至於送啲乜，佢就大賣關子不肯透露，強調一切只係「心意」喎，佢又透露自己同黃玉山有淵源，其實早於九十年代初，已經一同做公職互相認識。
除咗現場星光熠熠外，一對新人喺酒店場地布置方面嘅心思係另一亮點，首先宴會廳外拍照場地，主要以紫色和白色為主色，感覺簡單柔和，又擺放多款杯形蛋糕（Cupcake）供到場嘉賓享用；至於宴會廳內主舞台，以紅色為底色，配以一對新人英文名字，砌成「囍」字。
滿場飛與賓客合照
黃玉山伉儷眼見愛子成家立室，全日都笑意盈盈，並且「滿場飛」同親朋好友合照留念，大會更因應嘉賓需要，可以提供即影即列印相片供嘉賓留念，認真貼心。當問到會否希望兒子同新抱快啲生BB，黃玉山話一切順其自然，不會畀壓力佢哋喎。
卓妮