政情：立會「區會化」 蛇蟲鼠蟻擺上枱
立法會應該係討論政策或重要社會議題嘅地方，但隨着直選議員愈來愈多，將好多地區議題搬到立法會討論，令立法會「區議會化」。好似尋日立法會大會上，議員蔣麗芸（Ann）向當局戶映九龍西選區內嘅木蝨問題嚴重。另一新界東議員葛珮帆（EQ）就問屋邨啲曱甴蔓延得太快，可以點解決喎，搞到食物及衞生局局長高永文抓晒頭唔識答，改為講滅蚊，認真得啖笑。
阿Ann尋日提出口頭質詢，話食環署同房屋署今年首八個月收到四百幾宗木蝨投訴，較去年全年多出三倍，但房屋署就以蝨患問題屬個別零星個案為由拒絕提供協助。佢話私人公司除蝨服務收費有時高達萬幾元，公屋居民難以負擔，要求當局設立機制監察全港蝨患嘅分布及擴散情況，協助住戶滅絕蝨患，甚至進行全港性滅蝨大行動。
高永文無厘頭答滅蚊
高永文回應話，食環署職員有就木蝨投訴作出調查，但暫時仲未發現有公眾地方出現蝨患。唔知木蝨呢個話題係咪唔夠資料撐夠開場發言，高永文於是轉移話題講滅蚊，話食環署有同其他部門進行跨部門滅蚊工作，而防蚊患督導委員會亦會召開會議，目前未發現有登革熱個案。
EQ促行政手段治曱甴
聽到局長答覆真係九唔搭八，阿Ann就叫高永文唔好再轉移視線，希望政府對症下藥，資助貧困戶滅木蝨。阿Ann問完無幾耐，EQ就叉開話題，反映唔少市民投訴有好多曱甴由渠口位爬入屋，問高永文可唔可以用行政手段解決問題喎。行政手段？莫非佢又想當局進行全港殺滅曱甴大行動？
聽到議員問完木蝨又問曱甴，高永文只能重申政府非常關注事件，但強調絕大部分蝨患喺私人地方發生，屬於私人責任，而署方亦無足夠人手協助居民滅蝨，反建議住戶透過業主立案法團或互助委員會，聘請較大規模嘅滅蟲公司進行一次過滅蝨工作。之前議員梁美芬為捉老鼠而打響「鼠王芬」名堂，話唔定阿Ann滅蝨有功可再成為佳話，唔知到時會否被封為「蝨芸」呢？