政情：今日你上鏡：任「和平使者」 郎朗感榮幸

國際著名鋼琴家郎朗除咗鋼琴技巧耍家，近年仲熱心公益慈善事務，尋日佢仲開始肩負起宣揚和平嘅重任，因為聯合國任命佢做「聯合國和平使者」。三十一歲嘅郎朗，係聯合國最後生嘅和平使者，亦係繼知名華人大提琴家馬友友後，聯合國另一位華人和平使者。聯合國秘書長潘基文前日親自向郎朗頒授任命狀，大讚郎朗做聯合國兒童基金會親善大使時，經常以音樂感動、鼓勵世界各地聽眾去改善兒童生活，希望郎朗做咗和平使者後，繼續以音樂宣揚和平同幫助聯合國拓展公眾認知。郎朗話對於獲任命感到榮幸，會盡最大努力為聯合國作出貢獻。