政務司司長林鄭月娥尋日出席立法會扶貧小組委員會，報告政府扶貧委員會嘅工作進展。議員陳志全（慢必）不滿政府冇為滅貧定下目標之餘，仲無啦啦扯到減肥，話政府做隻減肥藥叫人減肥，一味話有功效，但點知塊鏡照唔到，個磅係磅唔到嘅。林鄭就反駁話︰「塊鏡不但止照到，仲照得好清楚，如果有貧窮線、有塊鏡喺度，但咩都唔做，只係自取其辱。」其實佢哋係講緊政府推出扶貧措施後，究竟能否量化措施嘅成效，但將話題扯到去減肥，似乎唔係好啱，依家講緊扶貧，貧窮人士應該增肥至啱。
