政情：立會明信片 用陳年舊照
立法會為咗加深公眾對立法會歷史發展同工作嘅認識，並提升立法會形象，於是喺前年向政府郵票設計資詢委員會建議，設計一套以「我們的立法會」為主題嘅郵票。事隔兩年幾，呢套一套四枚嘅郵票將喺十二月五日發售。為咗隆重其事，立法會仲特登搞咗個「從立法局到立法會」主題活動同展覽添。
呢套「我們的立法會」有枚郵票，印有立法會綜合大樓及會議廳、立法會舊大樓及會議廳，而且仲附有一個貼晒全套四枚郵票嘅首日封，以立法會會徽特別郵戳蓋印。而今屆七十位議員嘅大合照就印喺套摺入面。聽講呢套郵票係立法會向香港郵政提供照片，再由香港郵政負責設計，除咗首日封、套摺外，仲有明信片、鎖匙扣等精品發售。
「竹籬笆」最高法院年代
不過，我哋就發現其中一張中環舊立法會大樓嘅明信片，用咗一張陳年舊照，按照片內嘅環境，高樓都冇幢，應該係最高法院年代嘅大樓，旁邊仲有個疑似係英國愛德華七世嘅銅像，四周設有竹籬笆。如果呢個講法屬實，咁張明信片能否代表到一九八五先入伙嘅中環舊立法會大樓呢？