政情：政黨紛出擊備選兩區
呢幾屆區議會因各種原因經常要補選，各大政黨政團都趁機「搶灘」，繼民協林健文喺油尖旺區議會京士柏選區補選勝出後，未來半年可能再有兩個選區要補選，分別係離島東涌北及東區南豐選區，各大政黨已對議席虎視眈眈，有理無理已率先「備選」，靜待議席出缺成為事實。最終建制派或泛民主派邊方選贏，肯定對二○一五年區議會換屆選舉有利，而補選亦可作為區選前哨戰。
有地區消息話，各黨派近月不約而同覬覦兩個有機會出現補選嘅區議會議席，首個係屬於中產選區嘅離島東涌北選區。
林悅捲官司 傳有「替補」
由於當區區議員林悅捲入一宗官司，雖然未知最後有乜結果，但據聞泛民同建制派政黨已經落區做定工夫，包括派人跨區做街站，以及搵定專業人士做「替補」。此外，據聞有前離島委任區議員接連針對中產議題發聲，似有異動，似乎有意染指埋一份。
梁淑楨遭「插手」地區事
至於東區南豐議席方面，當區區議員、民主黨梁淑楨今年初嚴重中風後，建制同泛民各大政黨「插手」當區事務愈來愈明顯，先有反對某國際學校興建新校舍，其後梁淑楨繼續向東區區議會請假，然而本月初東區區議會閉門商討後通過不再接受梁淑楨嘅請假申請。根據《區議會條例》，區議員若未得區議會同意而連續兩次缺席區議會大會，就會喪失議員資格，意味該區可能要補選。
據聞建制同泛民各方人士都知此事處理得稍一不慎，就會畀人批評乘人之危，因此一直都低調行事，但低調還低調，其實已有盤算，其實梁淑楨本人同東區區議會主席黃建彬嘅助理都一早密密落區「備選」。不過話分兩頭，上述部署都只係前期沙盤推演，講到尾係咪真係有上述兩場補選出現，就要密切留意事態發展先可作準，但就算最終補選不成，政當落區備選亦可作為二○一五年區議會選舉嘅熱身。