政情：中環出更：鍾意細路肥亨大女想做媽咪
政府提供誘因鼓勵市民生仔，名人紛響應。智樂兒童遊樂協會日前喺金鐘一間酒店舉行慈善晚宴，多位星級父母齊現身大談湊仔經之餘，前年出嫁嘅商務及經濟發展局前局長馬時亨大女馬露明（Christine），都話渴望做媽咪，與醫生老公劉仲恒（Kevin）互有默契，隨時準備迎接新生命來臨。
Christine同Kevin手拖手赴宴，非常溫馨。問佢幾時做媽咪，Christine甜絲絲望住老公問：「我哋幾時生BB？」，Sweet到極。原來由Christine結婚第一日起，爸爸已催促佢努力「造人」，佢同老公都鍾意小朋友，但現階段先好好享受二人世界，早前同遊北京同美國，聖誕又去泰國清邁。
名人暢談湊仔經
晚宴上，名人話題離不開分享湊仔經，身為三子之母嘅晚宴籌委會主席劉雪文（Michelle）就慨嘆時下部分家長當子女係「玻璃」，過分溺愛同保護，反而佢鼓勵兒子學騎馬、冰上曲棍球，喺跌跌碰碰中成長。Michelle又帶兒子到深水埗探訪露宿者，等佢哋明白幸福並非必然。
同場仲有大家樂集團主席陳裕光千金陳浩寧（Candice）同夫婿趙益坤，講起七個月大嘅兒子Logan就甜到漏喇。Candice極速修身，身形回到未生時，但原來佢又準備懷孕，希望盡快三年抱兩，為兒子添個伴。做咗媽咪後，刺激Candice嘅創作靈感，不時為好友家居設計BB房，滿足感爆燈。
卓妮