香港考試及評核局（考評局）月初被踢爆連年虧損仲申撥七百萬元公帑，向員工豪派花紅。曾任考評局主席七年嘅教育局局長吳克儉（吳得掂），至今依然死撐考評局派花紅係為咗挽留人才，但就自爆局方流失率喺過去四年，只係回落咗零點二個百分點，筆花紅形同掟落鹹水海。議員郭家麒就寸爆話，若果分花紅真係留到人才，政府應率先向政治助理派錢啦！
吳得掂尋日喺立法會大會「連中三元」回應三條口頭質詢，對於考評局嘅派錢風波，吳得掂死撐舊伙計，話員工過去幾年為咗推行新高中文憑試（DSE），平日開工十八個鐘，紅日都返工搞到停車場爆哂，連農曆新年都唔例外。考評局最後爆發離職潮，個別部門有三、四成人跳槽，出動銀彈都係為咗留人啫。如果錢係萬能，又可唔可以學郭家麒話齋，挽留已經有三人跳船嘅政助團隊呢？
民政事務局政助徐英偉話，打呢份工唔係為咗加人工，唔係好緊張錢銀嘅嘢。食物及衞生局政助陳凱欣就擁抱現實主義，話有得加人工梗係好啦，但今屆政府嘅工作唔能夠單純以人工量化得到。莫非佢暗示叫政府一係唔派花紅，一派就要派多啲？