政情：董耀中續掌旅議會兩年
政府將於二○一五年成立旅遊業監管局（旅監局），接手現時旅遊業議會（旅議會）向業界發牌及規管業界嘅工作，但點知呢個安排就打亂咗旅遊業議會總幹事董耀中（阿董）嘅退休大計。原定今年十二月退休嘅阿董，要再延任兩年，先至正式享受退休生活。阿董話，家人冇投訴，仲話最緊要佢做得開心、冇壓力，體力可以應付就得嘞。不過，對於未必人人都撐拒留任，阿董就話：「笑罵由人早已習慣了！」
無人接棒 退休一拖再拖
其實阿董原定二○一一年退休，旅議會當年花咗四十多萬元公開招聘總幹事，並覓得合適人選，但新接班人竟然臨時縮沙，結果阿董被游說「再坐一會」，押後兩年至今年底才退休。不過，由於政府決定於一五年成立旅監局，旅議會考慮到若重新招聘總幹事，任期太短未必有人願入職，理事會亦認為在過渡期間，一個經驗豐富嘅總幹事對議會非常重要，因此決定邀請阿董再延任兩年，即阿董前後要延遲四年先可退休喇。