政情：立會保安司機 爆「房戰」
立法會搬咗去金鐘添馬艦新大樓後，雖然地方闊落咗，但被揭發依然唔夠地方用。事緣新大樓入伙之後，因為地方大咗，保安人員亦請多咗，自然要安排地方畀班保安人員休息，但點知原來新大樓當初並未有安排足夠房間畀班保安人員休息，搞到班保安大哥要同秘書處及議員嘅司機大佬爭房用，仲一度盛傳爭位爭到去「爆炸品處理房」添！呢場紛爭直至最近先至平息。
由於立法會中環舊大樓搬到金鐘，細屋搬大屋，需要嘅保安人員亦都多咗，立法會於是請多咗幾十個保安員，令保安團隊增至九十人。
鬥到去「爆炸品處理房」
不過，原來一班保安大哥喺中環舊大樓時已經冇特定嘅休息室，搞到連肚餓想煮個麵嘅地方都冇，所以佢哋搬去新大樓後，佢哋首要爭取目標就係要有一個專用嘅休息室，亦因為咁而掀起佢哋同一班議員司機大佬嘅房間爭奪戰。
唔知係咪班保安大哥人多勢眾，聲都大啲，秘書處就將原本供一班秘書處及議員司機使用嘅休息室改為保安人員休息室。班司機大佬就惟有暫時被安排搬去地下公眾人士入口升降機隔離一間房。盛傳呢間房原本係「爆炸品處理房」，立法會萬一收到爆炸品或可疑郵件，就會喺呢間房「拆彈」。但據我哋了解，後來立法會認為冇咁嘅需要，所以呢間房就預留畀文件收發組用。
促建築署「加建」息紛爭
不過，由於文件收發組要處理嘅郵件日益增多，依家嘅文件收發室都面臨逼爆危機，所以文件收發組將會收番依家嘅司機休息室，令一班司機又面臨「迫遷」，真係佛都有火。為平息紛爭，立法會秘書處早前已要求建築署喺新大樓LG1、即地庫第一層停車場設立一間司機休息室，有關工程已接近完工，預計本月底就可以開放畀班司機使用。希望班司機搬咗咁多次之後，可以有個安樂窩啦！