中環出更：AO做狗仔隊 另類培訓
政黨靠民意同選票生存係不變定律，所以即使立法會以建制派佔多數，政府議案都唔一定獲通過，搞到政府經常要出動AO（政務官）狗仔隊箍票。立法會議員梁耀忠尋日就質詢政府安排咗幾多人、職級及開支。公務員事務局局長鄧國威就話，對於資歷淺嘅同事，（目及）實議員出入都係經驗培訓一部分喎，唔知每個月收幾萬元人工嘅AO係咪咁諗呢？
阿忠被（目及）好唔舒服
每當立法會有敏感議案，就會派出好多AO狗仔隊企住喺會議廳外，望住張議員名單兼（目及）實班議員出入，避免走失，一票都不能少。阿忠就話，畀班狗仔隊（目及）到好唔舒服，佢哋根本唔係做政策游說，而係監視。
鄧國威回應話，重要或辯論時間長嘅議案，先會派公務員落立法會，由各司局長決定人手數目，通常副局、常秘、副秘呢啲高級官員先係負責最後游說。至於資歷淺嘅同事，幫手睇人同向司局長匯報議會最新情況，其實都係經驗培訓一部分，佢做咗廿幾年，一直都有呢啲工作，所以唔涉及額外資源喎。
卓妮