中環出更：遏止假茅台 楊華勇有計

依家假茅台成風，好多不法之徒會收集茅台樽倒入假酒出售。由於Johnny愛茅台，而佢爸爸楊孫西更係茅台之友協會監事長，家中閒閒哋有逾百支茅台坐鎮，正因為消耗量大，茅台「吉樽」自然多。

空樽唔亂丟當擺設

為免不法之徒偷收集舊樽賣假酒，Johnny話每逢飲完嘅茅台空樽都唔會亂丟，寧願放喺屋企當擺設，結果愈擺愈多，朋友到訪見到都嚇一跳。

五十年茅台飄香撲鼻，廖偉麟（左起）、莎莎國際女婿陳振邦及富商趙世曾公子趙式浩，乾完一杯又一杯。	茅台之友青委會成立，莊家彬（左）、楊政龍（中）及楊華勇（右）拍住上。（葉華英攝）	前保良局主席梁寶珠千金林玉茵（左）與潮州商會青委副主任林淑怡都淺嘗茅台。

講番茅台之友青委會，啱啱成立就有逾百名會員，除咗主任Albert外，仲有香港青聯主席霍啟剛、英皇集團企業行政主任楊政龍、廖創興家族後人廖偉麟等人。難得咁高興，茅台之友協會副會長吳永嘉特別訂製專用酒。佢話，協會一向用藍色樽裝五十年茅台，原本想為青委會選用青綠色樽，寓意朝氣勃勃，點知一問之下，「綠茅」嘅普通話發音同「綠帽」好似，為免貽笑大方，於是採用紫色樽穩陣啲。

首批訂製嘅「紫茅」年份約十五至二十年，一共有六千支，只供會員認購，想擁有就要入會或託會員買喇。不過，想推動年輕人飲茅台，真係要諗吓橋至得，所以Albert就構思舉辦首屆茅台雞尾酒大賽，又計劃將茅台入饌，融入美食，來個創意烹飪比賽。

卓妮