政情：特權法投票 考起議員
近來的免費電視發牌風波，又為泛民主派議員提供彈藥，建議引用《權力及特權條例》要求政府公開行政會議討論電視發牌嘅內部文件。以往泛民用呢招通常都係擺姿態居多，九成唔夠票通過，但今次有多名建制派議員都舉旗不定，似乎個個都好頭痕，包括議員謝偉俊、工業界林大輝，特別係大家都（目及）實體育、演藝及文化出版界馬逢國嘅投票取態，事關今次風波係佢業界議題，如果撐泛民會被批唔維護政府，撐政府又對唔住業界，究竟佢會點拆呢個政治炸彈呢？
由於引用特權法需要立法會分組點票通過，即係地方直選同功能界別各有十八票贊成才通過，泛民喺地區直選當然無問題啦，但功能界別就視乎建制派取態。據理解，從前撐開政府嘅個別功能界別議員都仲未決定點投票，反而過往閃閃縮縮嘅醫學界梁家騮竟然斬釘截鐵話會投票支持，係真唔係就留意佢到時有冇影喇！另外，建制派內亦注視馬逢國嘅投票取向，皆因同佢代表演藝界有關。
根據過往一年觀察，馬逢國嘅立場都係撐政府居多，佢從未試過投票同政府唱反調。不過，今次政府免費電視發牌風波，演藝界以至泛民都要求政府公開發牌「謎底」，馬逢國作為業界代表，究竟會點投票呢？我哋問馬逢國到底撐邊面，佢就答得好玄，話政府應該解釋清楚少少，例如點解只係發兩個牌。至於係咪贊成引用特權法要求政府公開行會資料，佢就無正面回答，只係話要睇睇政府點解釋先再決定，現時好難講投票取態喎。
建制功能界別成關鍵
同樣未決定投票取向嘅仲有謝偉俊、林大輝及部分功能界別議員，如果佢哋支持政府、投反對票，咁政府應該大步檻過，所以政府內部評估，最緊要係睇實一眾建制派功能界別議員投票，一票都不能少，但未來民情走勢係點發展，相信政府都好難掌握。不過，有人認為議員必須審慎考慮，行會內容保密制向來行之有效，係咪因為發牌風波就要引用特權法破壞呢個保密制度呢？