港鐵上水站「霸道」礙行人
繼粉嶺站被揭逃生梯阻塞行人路後，港鐵再被指在上水站「霸道」！潘先生指出，上水站上層行人通道被放滿流動升降台及圍板，佔用整條通道三分之一空間，「有成十幾部升降台放咗喺度年幾兩年，一路都冇人郁過，搞到條路好窄，繁忙時間真係好逼！」潘指該通道平日人流如鯽，要求港鐵盡快移走升降台，確保通道暢通無阻。
改善工程年底竣工
港鐵發言人表示，上水站現時正進行美化及提升車站設施工程，流動升降台於晚上收車後會作高空工作使用，日間需臨時放置車站範圍。發言人續指，職員已督促承建商減少佔用地方，亦不時巡視確保通道暢通，有關車站大型改善工程預計可在今年年底完工。
「我晚晚都半夜落街食消夜，都未見過有人郁過啲嘢，就算有工程都冇可能霸條行人通道擺嘢啦！」潘先生坦言不滿港鐵的回應，直指港鐵為貪一時之便而長期佔用通道儲物，有漠視乘客利益之嫌。