政情：治醫局頑疾當「仁」不讓
政府最近公布香港公開大學校長梁智仁將會喺十二月出任醫院管理局主席，接替掌管咗醫管局九年嘅胡定旭（肥胡）。梁智仁已經年過七旬，唔少人都揣測點解會搵個年紀咁大嘅人接手醫管局呢個燙手山芋，莫非又係乜營物營嘅原因，令政府搵唔到人﹖不過我哋聽聞，其實係因為醫管局改革如箭在弦，政府希望搵個唔惹火、冇是非、熟悉公立醫院運作又得到行內尊重嘅人擔當呢個重要職位，而梁智仁就係不二之選。
隨住肥胡喺醫管局嘅任期即將屆滿，外界對於醫管局新主席嘅人選一直都有唔少揣測。而政府喺上個星期就宣布咗由憑外表點睇都唔似七十一歲嘅梁智仁擔任呢個要職。唔少人都以為，一定係政府搵唔到可委以重任嘅人，所以至委任梁智仁。原來梁智仁係醫療界高人，貪佢本身係醫生，近年又同醫學界保持距離，佢嘅兄長梁智鴻亦做過兩年幾醫管局主席。
梁智仁低調 熟悉業界運作
梁智仁本身係國際著名骨科專家，喺香港大學醫學院任職三十八年，除咗曾擔任多年系主任，更加係兩屆醫學院院長。○三年梁智仁退休後加入公開大學，十年間令公開大學由冇咩人識變得有聲有色，依家仲可經大學聯招收生，可見佢並唔簡單。不過最緊要都係梁智仁向來作風低調唔惹火，喺醫學界又德高望重，加上佢年事已高，大家都唔會亂猜測有咩利益衝突。亦都因為咁，政府早排成立嘅負責調查廉政公署公務酬酢、外訪及餽贈嘅獨立檢討委員會佢都有份擔任委員。
其實醫管局多年嚟積累咗唔少問題，包括聯網制度下嘅「山頭主義」，搞到七個聯網有七套管理架構，加上該局肥上瘦下，導致前線資源缺乏，醫護人手長期不足，病人睇症等到頸都長，連肥胡自己都承認，喺任內未能解決人手緊張問題係最令佢遺憾嘅事。
俗語話「薑愈老愈辣」，梁智仁究竟可唔可以幫醫管局大改革、治理好醫管局嘅「頑疾」，大家就要拭目以待喇。