取景收茶錢 絕迹多年
【本報訊】電影拍攝外景時被勒收陀地的事件，在八、九十年代情況嚴重，據悉，當年電影公司為求拍攝順利，加上勒收的金錢一般都是幾千元，通常會當茶錢給對方以求方便。但在美國，因電影公司會先聯絡當地警方協助，因此不會有人收陀地的問題。
八九十年代最嚴重
導演王晶表示，近十幾年都未見過有人收陀地，八、九十年代常有，如果遇到就當場租給他。好似去美國拍戲，都會事先聯絡當地警方及有關部門作出安排，「咁仲點會有呢啲嘢」。另一導演劉偉強謂，以前去新界偏遠地方取景拍戲亦遇見過收陀地，他指「遇到呢啲事一定係報警」。
香港電影工作者總會執委楊菁菁指，八、九十年代香港收陀地情況嚴重，製片會以茶錢方式給對方。近年勒收陀地減少，主因是在本港開拍的電影也大減。現時在港拍戲遇上收陀地必定報警。
陳百祥則反問：「香港仲有呢啲嘢？」並指收陀地「搵唔到食」，香港是世界上最好的城市之一，收陀地走唔甩，一定被拘捕。途經拍攝現場的盧大衛，被記者問到：「呢度有人收陀地喎，點呀？」即笑住口講「我嚟收啦！」並指從未遇過收陀地。