新民黨立法會議員田北辰（田二少）真係遇人不淑，點解咁講？皆因佢嘅無間道前助理趙恩來（阿來）過檔工黨後，唔單止想參選二○一五年區議會選舉荃灣愉景選區硬撼田二少，據聞佢仲聲稱話要揭舊老闆田二少嘅黑材料添！
不過，喺泛民主派協調下，似乎阿來已經冇乜機會出選愉景選區，有消息話阿來可能轉戰荃威選區，如果真有其事，又會好大機會搞禍田二少喺區選開枝散葉嘅大計。
據聞除咗阿來轉戰荃威選區外，田二少都計劃派出嘅愛徒李維出戰，挑戰現任獨立議員林婉濱。不過，建制派內部都有參選協調機制，如果泛民冇派人出選，建制派各黨自然可以派人對壘。不過，如果阿來參選的話，建制派就要協調只能派出一人出選，否則會互相搶票、分薄票源，正因為咁，李維好可能要讓路畀林婉濱出選，所以田二少確係被阿來呢個前助理害得慘喇。
講開又講，立法會發展事務委員會前日開會訂定本年度議程同會期，最後一次會議定於明年七月中旬，有議員質疑點解最後一次委員會會議要安排遲過大會開，擔心到時可能會唔齊人開會。議員陳偉業（大舊）聽到後立即扯火，大鬧啲議員「新貴」話：「七月初放假？返去瞓啦！」其實呢個話題討論期間，議員們你一言、我一語，搞到好混亂，結果大舊口中嘅「新貴」就被誤會咗係田北辰，但實情係葉國謙提出唔想咁遲開會，所以要「返去瞓」嘅應該係阿謙至真！