自從政壇傳出南區區議員馮煒光會接掌政府新聞統籌專員（IC）個位後，輿論似乎都係劣評如潮，難為佢仲自比「白宮發言人」。佢為咗入政府可謂破釜沉舟，除咗退黨兼一早放風話唔選下屆區議會外，仲連自己創立嘅公關公司董事都唔撈，免得入到政府被人口實，如果最後一旦做唔成IC，睇怕佢隨時變成「三失」中年喇！
自從馮煒光接任IC嘅消息傳出後，好少人撐佢，就連佢將來一齊合作嘅政府中人都有好大反響。有官場中人話，其實政府內部都好少人知馮煒光接任IC呢個消息，其中政府新聞處（GIS）中人異議都幾大。雖然IC係隸屬特首辦，但係某程度都可以點GIS嘅人，面對咁嘅老細，就緊係反彈啦！
如果馮煒光最後因為各方劣評而做唔成IC，原本佢都可以繼續做番個區議員，可惜佢一早放風話唔選，結果引狼入室，令其他泛民黨派對佢個議席虎視眈眈，就算想連任都好難。再者，有網民翻佢舊帳，話佢兩年前喺區議會選舉論壇質問其餘三個候選人，話有個別政黨嘅區議員做做吓辭職加入政府，點樣說服選民會有承擔呢？如果佢真係辭職入政府，咁就真係自打嘴巴喇。