政情：唐唐訪中學 暢談風涼話
前政務司司長唐英年（唐唐）喺去年特首選舉落敗後，生活似乎歸於平淡，除咗外遊唔係香港，只係有時見佢去中環買吓咖啡。不過，佢尋日竟然喺香港友好協進會安排下去咗間中學，表面話同校內百幾名學生講中港兩地關係，但似乎喺度講風涼話。佢話自己在任財政司司長時，面對經濟低迷都堅持唔削減教育、福利及醫療開支，又話社會福利唔係單純派錢，而係要刺激經濟、創造就業喎。
睇企鵝 體悟團結重要？
唐唐講咗咁多，好似任內真係做咗好多咁，可惜佢似乎忘記咗，唔少工作都係佢之前任財政司司長梁錦松一早種下嘅種子，早就削減開支，佢先至有收成，呢啲叫前人種樹，後人乘涼享福。此外，唐唐仲借自己去南極嘅體驗訓勉同學，話喺當地深深體會到「團結就是力量」嘅道理喎。因為企鵝為應付嚴寒會聚成一大群以及一個圓形，等外層企鵝負責擋風，內層負責保護小企鵝，定時就更替崗位咁話。
現時香港社會分化嚴重，新政府又受到外圍攻擊，既然唐唐去完南極體會「團結就是力量」到呢個道理，唔知佢會唔會識得實踐，盡量少啲出聲當幫忙呢？